Detail Berita

Kabudayan

Dening: Oyikas Putrardi

Thole,...rungokna dongengku,

awake dhewe iki urip ing tlatah kang mbudaya

 nunggak semi saka para leluhur wiwit jaman kamulan

sing dadi gawar lan kentheng kendhalining rasa

dimen lakumu ora mbedhal, mberot, temah nabras-nabras

nerak wewaler...

nrajang tatanan...

m ung merga mbujung lan mburu adrenging karep lan pakareman.

Thole,...semaken lan gatekna,

Iya mung kabudayan sing bisa paweh tenger lan tengara

tengarane kapribaden nusa lan bangsamu, lan

kang  kuwawa njunjung drajat saka jurang kanisthan

sing cetha mbedakake endi blegere manungsa lan kewan.

Mbesok Thole...

bakal teka peranganing jaman kang mbedhah kikis

satemah donya dadi mungkret

ora ana tembung adoh, jembar, apa meneh suwe

anane mung tembung cerak, ciut lan cepet

amarga donya mung ana ing gegeman.

Ing kalamangsa kuwi Thole...

sapa kang cukat trengginas bakal sasap

sapa randhat bakal kasrakat

tatakrama, unggah-ungguh, tepasalira

mung kari aran kang tinemune ing buku sisa ngenget

aja kok takoke meneh; menyang ngendi lungane rasa.

Thole...openana

mumpung durung katekan jaman mbedhah kikis

isih cukup wektu kanggo nulak bebendu

kanthi kupiya nguri-uri lan tetirah budayane simbah

ngipuk-ipuk adat, tradhisi, lan ngasah rasa.

Aja pisan ngucap kuna amarga kowe durung ngerti sing sanyatane

rikalane jaman durung kaya jamanmu iki, sing kanggomu wis sarwa maju

satemene: simbah wis kulina nrawang jantraning urip, ngerti tanpa winarah

mabur tanpa elar lan mletik tanpa suthang.

PungkasaneThole...

Larahen lan runuten sadurunge kowe kelangan bandha sing pengaji.

                                                                                                         Wareng, 10 Oktober 2017