Detail Berita

TLATAH

Dening: Oyikas Putrardi

Ya, mitra

Sebutan tlatah cengkar wis arang keprungu

Larang banyu iku crita wingi sing wis wayu

Thiwul gathot kicak dudu panganan poyokan

Malik dadi kuliner pasren sing edi peni

Ya, mitra

Tlatahmu saiki wis makmur, bumimu wis subur

Uripmu mulya nyandhing bandha

Nanging apa kowe ya rumangsa?

Kanggo pituwas sakabehe kuwi, ana sing thethel seka jatining dhiri

Sing pengaji?

Ya, mitra

Tepasalira wis wiwit asat saka kedhunging rasa

Gugur gunung wis ora guyup maneh

Rasa isin wis suwe ilang saka bausastraning ati

Sing dioyak mung moncering urip

Kalenggahan, kawibawan semu lan kelangenan!

Nadyan kanggo iku....

Kudu adol sengguh

Kudu ngidak yen perlu mithes

Sanak rowang sing dianggep pepalang

Ya, mitra

Saiki wis nyedhaki tumekane

Jaman edan jangkane Pujangga wegig

Titimangsane manungsa padha edan kekarepan

Ya, mitra...kandhamu bener!

Pancen durung kabeh nglakoni

Nadyan ora akeh, isik ana

Paraga sing ora keli

Lan ora sulap ing gebyar

Merga ngerti yen iku mung thathit

Ya, mitra...pancen isik ana

Glintiraning pawongan sing isik percaya

Yen isik ana nung ing sajroning ning

                                                                                                   Wareng, 16 mei 2017